حلمي عبد الباقي: أخلاقيات الوسط الفني مش زي زمان وده سبب رفضي دخول بناتي المجال

حلمي عبد الباقي: أخلاقيات الوسط الفني مش زي زمان وده سبب رفضي دخول بناتي المجال

فن بوست – فريق التحرير

كشف الفنان حلمي عبد الباقي سبب رفضه دخول بناته مجال الفن والغناء.

وقال “عبد الباقي” خلال لقائه في برنامج “سبوت لايت” من تقديم شيرين سليمان عبر قناة “صدى البلد”: الموضوع صعب وأنا شوية فلاح ومش حابب أنهم يتعبوا ويشوفوا اللي أنا شفته الوسط دلوقتي يخليني قلقان الأخلاقيات مش زي زمان.

وتحدث “عبد الباقي” عن بناته وقال عنهن: عندي أربع بنات ومدلع خالص يا بخت اللي عنده بنات، أساميهم دينا وماهيتاب وساندي وباكينام، أمي كانت تقولي أنت مسمي لنا أسماء هندي ومكنتش تعرف تقول باكينام، كلهم متعلقين بيا، وبنتي الكبيرة دينا كانت بتغني وحافظة الأغاني بتاعتي أكتر مني.

مشوار فني حافل

تحدث حلمي عبد الباقي خلال اللقاء عن ذكرياته مع الغناء وبداية مشواره الفني وموقف تعرض له في حياته، وقال جيلنا كان محظوظ، ولكن مش محظوظ إعلاميا والمتلقي كان مختلف عن دلوقتي ولما كنا بنعمل أغنية كنا نتوقع أنها رايحة في حتة تانية لأن المتلقي سميع للأغاني.

وتابع حلمي: أنا اللي اكتشفت نفسي ومحدش اكتشفني وأنا من الزقازيق، وكان فيه أفراح عندنا وصاحب الفرح كان صحابي بيخلوني أغني، ولما جه العيد القومي لمحافظة الشرقية خلوني أغني في الحفلة دي، ومن ساعتنا اكتشفت أني بغني كويس.

وأضاف حلمي: على مدار حياتي في مواقف كتير لما بفتكرها بضحك، وكنت في كورال الجامعة بغني صولو ومكنتش أعرف يعني إيه موال ومقام، واتعلمت كل ده بالممارسة، ومرة كنت طالع في حفلة تبع الجامعة وكنت بغني للاستاذ محمد العزبي، وكنت مبسوط جدا وقتها ولما خلصت قولت للأستاذ قطب إيه رأيك؟ فقالي إيه القرف ده عمال تدخل من مقام وتدخل مقام تاني، وكانت نقلة في حياتي وكنت لازم اتعلم واثقف نفسي وبقيت أعرف من الموسيقيين كل حاجة محتاج أعرفها في المزيكا.

من هو حلمي عبد الباقي ؟

مطرب وممثل مصري، من مواليد مدينة الزقازيق بمحافظة الشرقية، درس في كلية التجارة بجامعة الزقازيق، وحاز على لقب مطرب الجامعة اﻷول 3 مرات.

اتجه في الاسكندرية للعمل في الغناء في الصالات وحفلات الزفاف. بدأ مشواره الفني فى العام 1985 بالبوم “الغربة” وعقبها ألبوم “اضحكي” ثم “عيني عليكي” في 1989 الذي كان سبب شهرته بأغنية “يا خطافة” وعقبها ألبوم “عجبتيني” عام 1990.

وقدم في 1991 ألبوم “اوعديني” ثم ألبوم “سلم عليها” عام 1992، ثم أعاد اكتشاف نفسه بألبوم “ذكريات” في 1995 وعقبه ألبوم “مع السلامة”. شارك بالتمثيل في أعمال (زمن الجدعان) و(إمبراطورية الجيارة) و(سفينة الحب والعذاب).