نيللي كريم: زيجاتي السابقة علمتني إن الست لازم تعتمد على نفسها

نيللي كريم: زيجاتي السابقة علمتني إن الست لازم تعتمد على نفسها

فن بوست – فريق التحرير

كشفت الفنانة نيللي كريم عن تجربتها من الزواج 3 مرات، موضحة ما تعلمته من تلك التجارب.

وقالت “كريم” خلال لقائها مع الإعلامي أنس بوخش في برنامج “ABtalks” الذي يعرض على موقع يوتيوب: “اتعلمت من الجواز الأول والتاني إن الست لازم تعتمد على نفسها 100% حتى لو كانت متجوزة 10 مرات، وجوزها كان ملياردير وعنده 100 طيارة”.

وأكملت: “لازم يكون عند الست حاجة بتحبها زي الشغل، محدش بيبقى مسئول عن سعادة حد لما البني آدم يكون مستقل وعارف هو عايز إيه هيعرف يبص للأمور بعين مختلفة”.

نيللي كريم تنصح الفتيات

نصحت نيللي كريم الفتيات من خبرتها وقالت: “أنتي مش قاعدة في الجوازة ومستحمله عشان الشخص اللي معاكي مرتاح ماديا وبيصرف عليكي أو قاعدة في الجوازة عشان خاطر تربي الولاد”.

استكملت: “عشان كده لما تحسي إنك مضطهدة نفسيا في علاقة أو جوازة أنتي مش عايزاها لازم تبقي قوية ومعتمدة على نفسك.. ده اللي أتعلمته.

وأردفت: “سمعت مقولة مضمونها (اختار شخص ما تقدرش تعيش من غيره، مش تقدر تعيش معه).. الاستقلالية مهمه نفسيا للست، وفي ناس بتفهم معنى القوة اللي بتديها الاستقلالية للست غلط وبيقولوا إنها عايزة تتحكم وده غلط جدا”.

واصلت: “الحياة اللي بيبقى فيها تنازلت دايما الست هتيجي بعد فترة وتقول لجوزها ده أنت اللي خلتني أبطل كذا وكان زماني دلوقتي كذا، وهنا هيبدأ الطرفين يلوموا بعض، والشخص مش هيرتاح لحد بيحبه إلا لو كان إنسان متحقق من جواه ومعندوش نقص يطلع على غيره فالاستقلالية مهمة أوي هنا عشان هي اللي بتعرف الإنسان هو مين بظبط وعايز ايه من حياته وإزاي يستمتع بيها مع نفسه”.

واختتمت: “أنا شايفة إن الاستقلالية دي حاجة جميلة خصوصا للبنت.. بعد الدراسة البنت لازم تحاول تلاقي شغل كويس ويبقى عندها مرتب عشان متطلبش حاجة من حد وتقدر تجيب كل اللي هي عايزاه، وأنا مع إن الولاد من سن 14 سنة ينزلوا يشتغلوا في الصيف لو 4 ساعات في اليوم عشان يعرفوا تمن القرش ويبقى معاهم الفلوس بتاعتهم هم يصرفوها في اللي بيحبوه بدل ما هم قاعدين اليوم كله على الإنترنت”.

آخر أعمالها

تعيش نيللي كريم حالة من النشاط الفني، حيث شاركت في مسلسل فاتن أمل حربي، والذي عرض في الموسم الرمضاني 2022 بالتعاون مع عدد كبير من الفنانين، أبرزهم شريف سلامة، ومن تأليف إبراهيم عيسى.

وتدور أحداث مسلسل” فاتن أمل حربي” في إطار اجتماعي درامي، حول مأساة “فاتن” والتي تلعب دورها نيللي كريم، مع زوجها ومشاكلها الزوجية معه، لتقرر الانفصال عنه، ظنًا منها أنها نجحت في القضاء على مشكلاتها، لكنها تواجه أزمات أخرى ببعض بنود قانون الأحوال الشخصية في مصر، والتي تقرر حرمانها من ابنتيها في حال زواجها من شخص آخر.