أخبار الفن

والد حلا شيحة عن تصريحاتها الأخيرة: “مش دي حلا اللي أنا أعرفها”

والد حلا شيحة عن تصريحاتها الأخيرة: “مش دي حلا اللي أنا أعرفها”

فن بوست – فريق التحرير

خرج الفنان التشكيلى أحمد شيحة  عن صمته، وعلق على تصريحات ابنته افنانة حلا الأخيرة التي آثار الجدل بحديثها عن التوبة عن الفن وندمها على عملها في فيلمها الأخير “مش أنا” مع تامر حسني 

وقال “شيحة” في تصريحات لموقع  “اليوم السابع”: “كلام ميصحش، وهي صورت الفيلم وكانت معجبة بيه جدا، والكلام ده ماعرفش أساسه إيه، أنتي صورتي وخلاص.. مش دي حلا اللي أنا أعرفها”.

وتابع معلقًا على موقف ابنته: “كانت عاتبت تامر حسني في التليفون، وأنا حضرت أول يوم تصوير معاهم وكان فرحان بينا جدا”.

والد حلا شيحة عن تصريحاتها الأخيرة: "مش دي حلا اللي أنا أعرفها"

شيحة يبارك لتامر ويتجاهل موقف ابنته

وتجاهل والد حلا شيحة تصريحات ابنته وموقفها الأخير من تامر حسني قائلًا: أقول لتامر مبروك، الفيلم ناجح جدا نتيجة لمجهود أتعمل، وبهني الناس اللي اشتغلت في الفيلم، والحمد لله الفيلم حقق إيرادات غير مسبوقة”.

واستطرد: “غير موافق على كلام حلا على الإطلاق وما ينفعش الكلام ده، ومش عشان خاطر هي بنتي هطاوعها في الغلط”.

تعليق تامر حسني على الأزمة

من جانبه، علق الفنان تامر حسني على هجوم الفنانة حلا شيحة ضده، بسبب عرض مشاهد رومانسية تجمعها به في فيديو كليب “بحبك” من فيلم الجديد “مش أنا” والمعروض حاليا بالسينمات.

ونشر “حسني” عبر صفحته الرسمية على موقع التواصل الاجتماعي فيسبوك، وكتب: “نهاركم جميل يا أغلى الناس، الحقيقة عمري ما بتخيل إني ادخل في نقاش بالشكل ده مع زميل بحترمه وكان في بينا كل خير”.

تابع: “للتوضيح بما إنك يا حلا كتبتي بوست وأشركتي الجمهور الكريم معانا بدل ما كنتي تكلميني شخصياً ونتناقش بيني وبينك، فأنا مضطر أرد هنا برضو.

وأكد: “أولاً أنا عمري ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد وأخلف، الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة”.

واستكمل: “وبعدين الفيلم بقاله 3 أسابيع في السينمات والكليب موجود جوة الفيلم، هو بالنسبالك الحرام إننا ننزل الكليب على اليوتيوب بس! إنما الكليب يتشاف جوه السينمات عادي؟ منطق غريب فعلاً يا حلا، وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه! هو مش أنتي اللي صورتيه ومثلتيه بنفسك وبمنتهى الرضا ولاّ حد أجبرك؟!”.

“وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملاحظة تقوليها، ماكنتيش بتردي علينا وتليفوناتك كلها كانت بتقفل في وشنا، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع! وبقيتي تقفلي تليفوناتك وتكنسلي علينا كلنا”.

أردف: “وبعدين أي فيلم بيبقى ليه خطة مسبقة في الدعاية وأنتي عارفاها كويس ووافقتي عليها ودا كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل؟! أنا زعلان منك جداً يا حلا على مفردات البوست بتاعك الغير موفقة ومستحيل هرد بطريقتك اللي فيها تجريح واتهامات باطلة ليا احتراماً لحاجات كتير يمكن فايتاكي بس مش هتفوتني وعلى فكرة أنا واثق إنك عارفة إني مستاهلش منك كدا وهكتفي بالتوضيح دا وربنا يهدي الجميع و يكتبلك كل الخير اللهم آمين”.

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *